Call Me
Shidodo
Ndi Igbo mmamma nu o!
A choro m iwere ohere a were kelee nwa afo Igbo obula ebe obula ha no. Ihe m na-ayo bu ka Osebuluwa nile chekwaa ma dokwaa unu ebe obula unu no n'elu uwa a. Ya were aka ya di ike were dube unu ebe obula unu na-aru oru—ma ndi nkuzi, ma ndi na-azu ahia, ma ndi oru aka, ma ndi dokinta, na ndi okwo ugbo ala nile; ma nwoke ma nwanyi; ma okenye ma nwatakiri; ma onye ukwu maa onye nta.
I lee anya, I ga-ahu na oteela m dere ihe obula n'asusu anyi ebe a. Ya kpatara m ji si ka m were asusu anyi dee ihe onye obula nwere ike guo ma ghota. O buru na i di ka m, e nwere mgbe ogologo oyibo ndi obodo a na-agwu m ike kpamkpam!
Ubochi a ka m na-awaghari na Youtube dika nchi were hu ofu egwu Igbo togburu onwe ya. Egechara m egwu a ma bidokwa ya n'isi ozo gee ya ugboro ise. Amaghi m ihe kpatara na m noro n'akuku obodo oyibo a nu egwu ndi be anyi o di ka a ga-asi na o na-ato uto karia. Eleghi anya o buru maka na ike mkpomkpo egwu nwuru ndi obodo a na-ege ejula m afo. Mana etu osina di, o buru na egwu ndi be anyi na-amasi gi, gbaa mbo bido choghariwa egwu na Youtube. O ga-atu gi n'anya ihu na otutu egwu ndi be anyi anorolaari na neeti na-eche onye ga-abia lee ma gee ha!
Tupu m chefuo ajambene m na-ako ebe a, a ga m egosi unu egwu ndi Enugu steeti m nuru mere m ka wetuo ukwu ma gbapu ezigbo egwu. Ka m jugodu gi—Ugboro ole ka inugoro egwu mere gi itogbo tombo, togbo remote control, togbo ihe obula I na-eme ma hudata ala were zopu egwu? Ofu? Abuo? Ato? Anaghi m ekwu maka egwu ndi ahu I ga-anu na-ekwe naani n'isi n'isi. Egwu a bu egwu a ga-agba agba. Osogodu ya buru na ukwu gbajiri gi, I ga-ewere ofu ukwu nke ozo were na-azopu egwu amala!
